Pepa o Faamatalaga: O Mafaufauga Fou i Matati’a Ausia a Le Matagaluega o Aoga, Taaloga Ma Aganuu

E fiafia lava le Matagaluega o Aoga, Taaloga ma Aganuu e faailoa le Tatalaina Aloaia o nisi o ana galuega e aofia ai;

1. Vaega: Faiga Faavae, Fuafuaga ma Suesuega

  • Anofale o Fuafuaga Autasi,  Matagaluega o Aoga, Taaloga ma Aganuu, 2021-2024

2. Vaega: Mataituina, Lauliliuina ma le Iloiloina o Galuega a Faiaoga

  • Tusi o Agavaa Moomia o Faiaoga ua Resitalaina Samoa, 2021

3. Vaega: Aganuu

  • Samoa Nei Galo (SNG) – Lomiga 9 & 10
  • Tusi Faitau mo Aoga Tulagalua (11)

4. Vaega: Mataupu Aoaoaina ma le Tusiaina o Tusi Aoga

  • Talapupuu & Solo

Ina ia o gatasi ma le Taiala o Atinae a le Malo, o Samoa na fausia mai ai e le Matagaluega lana Manulauti ia atagia ai tafa eseese o ana Galuega Faatino.

O se faatulagaga o aoaoga e lelei ma atoatoa, e amanaia le itu faaleagaga, faaleaganuu, mafaufau ma malosiaga o e auai, e mafai ai ona latou ausia a latou filifiliga iI lenei olaga.”

O loo faaauau pea galuega a le Matagaluega ia fausia ma faalauiloa i ana pa’aga aoaoga lelei atoatoa ma le faamamafa o loo ave lava i alo ma fanau a le atunuu e pei ona atagia i lana Manulauti. O lenei matati’a ua ausia, o fua o galuega a Vaega Taitasi o le Matagaluega ia siitia le tulaga o ana fuafuaga mamao ma faaauau le lelei o agavaa moomia mo faiaoga ma ia siitia taumafaiga a le fanau aoga. Ua ausia lenei matatia ona o le galulue punou ai o Vaega Taitasi o le Matagaluega ina ia siitia tulaga lelei o Aoaoga o fanau faapea le auaunaga a le aufaigaluega. E le gata I lea ao le faaauauina pea o Fuafuaga alualumamao o lenei auauanaga uma tau aoaoga.

Ua le faapito manu ia tasi a ua galulue le Matagaluega e tuufaatasia nei Lomiga fou ia aoga mo faiaoga, alo ma fanau aooga faapea le mamalu aemaise o le mamalu lautele o le atunuu.

O le Lomiga 9 & 10 o le Samoa Nei Galo ua aofia ai Talatuu ma Tala o le Vavau e fasefulu (40) le aofai, na mafai ona aoina mai i nuu ma afioaga. O le naunautaiga ia matuinoa le malupuipuia ma teumaluina o measina a Samoa.

O Tusi Faitau e sefulu ma le tasi (11) mo le Tausaga 1, i Aoga Tulagalua, ua tuufaatasia e fesoasoani i le aoaoina o le faitautusi o fanau aoga.

O le a faataunuuina le Faalauiloa ma le Tatalaina Aloaia nei Tusi mai Vaega e fa (4) o le Matagaluega o Aoga, Taaloga ma Aganuu i le Aso Lua 29 Iuni,  2021, i le taeao o le itula e 10.00 i le Potu Fono Fogafalelua o le Maota o Tuiatua Tupua Tamasese Efi, (TATTE) Sogi.

O le Saunoaga Autu o le aso o le a saunoa ai le Afioga ile Minisita, Hon. Loau Solamalemalo Keneti Sio. O le saunoaga faafeiloai ma le saunoaga faaiu o le Ofisa Sili o Pulega aua le paia o le auvalaaulia.

Afamasaga Dr. Karoline Afamasaga – Fuata’i
OFISA SILI O PULEGA
Matagaluega o Aoga, Taaloga ma Aganuu

Written by