Susuga i Faiaoga uma
Aoga a le Malo
Aoga a Ekalesia
Aoga Tumaoti
Aoga Faataitai.
Soifua manuia i le Mamalu o Faiaoga o Samoa.
E tuuina atu lenei faasilasilaga aloaia e tusa ma le faaiuga o le fonotaga a le Fono aoao Faiaoga o Samoa (National Teachers Council) i le aso 29 Aperila 2020 e faapea :
Muamua,e momoli atu le faafetai tele a le afioga i le Taitaifono ma le nofoā too mamalu, i faiaoga ua tuuina mai i totonu a latou tusi talosaga i le taimi ma le aso sa faatulagaina. Faafetai tele i lo outou amanaia mai ma le lagolagoina o le taumafai atu o la tatou Fono Aoao o Faiaoga a le Matagaluega o Aoga, Taaloga ma Aganuu. E ui i taimi faigata o tatou iai nei aemaise le taumafai mai o le Motu o Salafai, ae faamalo lava aua o le mea e iai le loto e iai foi le ala e fai ai. Faafetai i le faamaopopo mai i Susuga i Pule Aoga ma Asiasi Aoga.
Faafetai tele i le lagolago mai foi o faauluuluga (Boards & Principals) o Aoga a Ekalesia, Aoga Tumaoti ma Aoga Faataitai i e ua mafai ona tuuina mai a latou talosaga i le taimi na tuupoina. O loo iai lava ia sui filfilia mai i Aoga Ekalesia, Aoga Tumaoti ma Aoga Faataitai i totonu o lenei fonotaga, e faa auala mai ai ni faafesili e faamanino ai se mataupu o fia malamalama ai lo outou mamalu.
I le mamalu o Faiaoga uma, ua amata na silasila le Komiti filifilia a Faiaoga aoao o Samoa (Teachers Council) i talosaga ua tuuina mai . O le a toe fesootai atu lava ia le tamaitai Resitala Sinia i faiaoga e maua e le Komiti e
lei maea lelei ona faatumu pe tuuina mai pepa moomia.
Ole faaaliga lea, e saga faamalo atu ai ma faafetai tele galulue ma le lagolago mai.
Toe faamanatu atu foi le aso mulimuli mo talosaga uma e lei tuuina mai, faamolemole ua tatau ona tuu mai loa i totonu i le aso 29 o Me, 2020. Faapena foi i nisi o pepa e talosaga atu mo le toe faamaea mai pe faasa’o mai.
Manatua, e tatau ona maea faamauina (resitala) ia faiaoga uma i le 2021.
Ia manuia tele le feagai ma galuega. Faafetai.
Afamasaga Dr. Karoline Afamasaga-Fuata’i.
OFISA SILI O PULEGA
