Susuga Puleaoga
Aoga Tulagalua
Aoga Kolisi Maualuluga
Aoga a le Malo
Mataupu: COVID 19 PORTFOLIOS
Susuga e,
Ua faamalo le tatalo aemaise le to’a pea o le tai ao tatou feagai ai ma le pepesi mai o le faamai oti i o tatou uso tuaoi.
Ia viia le Alii ona o loo malu puipuia pea si o tatou atunuu, ae paga lea ona ua tofu i tatou ma tiute ua totofi ai ma e le mafai ona tuua ona o le manatu i o tatou foi tiute ua filifilia ai i tatou aua alo ma fanau.
E faailoa atu ai mo lo outou silafia o loo iai se galuega taua aua le tulituliloaina ma le iloiloina o a tatou galuega fai mo a tatou lipoti e ao ina ausia, aua e atagia ai galuega ausia a le fanau o loo faatinoina e Ie MERD
O le a fa’aaoga PORTFOLIOS a a outou susuga i puleaoga, pule lagolago, faiaoga faapea tamaiti taitasi e ave a ma molimau o faatinoga sa faia.
O le faila poo le Portfolio lenei, e ao ina tuuina mai ai fua poo molimau o galuega faatino mai le 6 vaiaso talu ona tuuina mai le Poloaiga mo Faalavelave Faafuasei mo i tatou, e ono iai se faaopoopoga e fua i faaiuga a le malo.
Ia fa’aaoga lau faila lea ua faaigoaina o le “COVID 19 PORTFOLIO”
E tuu uma iai au galuega sa fai pe sa faatino mai i le:
- Kuata 1, 2020 Vaiaso 8 – 10 ma le
- Kuata 2, 2020 Vaiaso 1 – 3
Ia o gatasi ma le polokalame a la outou aoga sa fa’ata’atia mo le tausaga (annual plan) ma kuata(term plan) faapea galuega o le aso (lesson plan),
E ao ina tuuina mai ai galuega sa tapenaina e lau susuga ma tuuina atu mo alo ma fanau, (WorkPlan)
E faapea foi galuega a fanau sa faatinoina i o outou aiga (students assessment/activities) ma toe tuuina mai e siakiina i le vai taimi tonu lea.
Ia manatua e ese mai lau faila (portfolio) lea ua leva ona iai au galuega muamua.
O nei galueaga uma o le a fa’aaogina lona taua i lau Iloiloga i le taimi o lau QAPA aemaise lou sauni atu mo le Resitala
Ia iai le agalelei ma le puipuiga a le Alii ia outou susuga faapea nai fanau.
Afamasaga Dr Karoline Afamasaga Fuatai
Ofisa Sili Matagaluega o Aoga, Taaloga & Aganuu.
