FAASILASILAGA TAUA: Tusi talosaga mo le resitalaina aloaia e avea ma faiaoga i Samoa.

15 Aperila 2020
Susuga i Pule Aoga & Pule lagolago
Alii ma tamaitai faiaoga uma
Aoga a le Malo
Aoga a Ekalesia
Aoga Tuma’oti

Mataupu: Tusi talosaga mo le faamauina (Resitalaina) aloaia e avea ma faiaoga i Samoa.

E muai avatu le faa-malo ma le agaga faafetai tele aua e talitonu o loo maua e outou uma le soifua manuia i nei vaitau e ui i le fesouaina ona o fita ua tatou feagai ma aafia ai le faatinoga o a tatou galuega. E talitonu le taofi a lo tatou Atua agalelei o loo faasino ala i a i tatou i avanoa e faaofi atu ai fesoasoani faa-le-aoaoga i fanau ua nonofo i fale. O tatou faanaunauga ia tapena i latou mo suega taua e tatau ona faatino i le faagasolo atu i lenei tausaga. Pe a oo ise taimi e toe amatalia ai aoga ina ua sologa manuia mea uma, e talitonu i le faigofie ona sosoo le fau ma le fau.

Talosaga atu ina ia tatou tutu faatasi ma le lototetele e faafetaiai suiga ina ia taumafai pea e faasaosao atu avanoa fesoasoani mo nai fanau e ala i aoaoga tuuina atu mo i latou i le fa’aaogaina lea o le silafia ma le tomai faa-tekonolosi.

Ae o lenei tusi, ua fia faamamafaina ma faamanatu atu ai i a outou Susuga uma i Faiaoga ona a le naunautai mo le tuuina mai o tusi talosaga i le masina lenei o Aperila e pei ona sa fautuaina ai faiaoga a le Malo (faagata i le faaiuga o Mati) ma faiaoga a Ekalesia & Aoga tumaoti (17 Aperila) O le aso 30 Aperila e fono ai le Fono aoao a Faiaoga (Teachers Council) ma iloa ai le tulaga o talosaga e pei ona ua faaoo mai.

Ua atoa nei le masina talu ona galulue ia sui o le Fono aoao a Faiaoga i le silasila totoa ma faatulaga tusi talosaga i le faamauina/resitalaina ai, ae faatasi foi ma i latou ua tuuina mai tusi peitai e le o atoa mai i totonu vaega uma e moomia.

Mo faiaoga uma o loo galulue i Savai’i, talosagaina le tuuina mai loa o a outou tusi talosaga manu na ua avanoa le alavaa, ina nei toe tapunia foi. Ao Upolu uma, faamolemole, e manatu le tatou Fono aoao a Faiaoga, ua tatau ona i totonu uma loa ia talosaga i le masina lenei o Aperila.

E tuualalo atu pea ina ia tatou tutu faatasi ma le lototetele ma le agaga faatuatua i le Atua e faigofie ai faatinoga o tatou tiute ma faiva i nei taimi faigata o le tatou olaga.

Faafetai tele lava.

Afamasaga Dr Karoline Afamasaga Fuatai
Ofisa Sili Matagaluega o Aoga, Taaloga & Aganuu.

Print Friendly, PDF & Email